NJoftim i dates 16 shkurt 2026- njoftim për shtyrje afati aplikimi për specialistë të jashtëm për validimin e 2 (dy) skeletkurrikulave të arsimit profesional

Agjencia Kombëtare e Arsimit, Formimit Profesional dhe Kualifikimeve (AKAFPK), në mbështetje të Ligjit nr. 7850, datë 29.07.1994, “Kodi Civil i Republikës së Shqipërisë”, i ndryshuar; Ligjit nr. 69/2012, “Për Sistemin Arsimor Parauniversitar në Republikën e Shqipërisë”, i ndryshuar; Ligjit nr. 15/2017, “Për Arsimin dhe Formimin Profesional në Republikën e Shqipërisë”, i ndryshuar; Ligjit nr. 10247, datë 04.03.2010, “Për Kornizën Shqiptare të Kualifikimeve”, i ndryshuar; Ligjit nr. 9380, datë 28.04.2005, “Për të drejtën e autorit dhe të drejtat e tjera të lidhura me të”, i ndryshuar; Ligjit nr. 9367, datë 07.04.2005, “Për parandalimin e konfliktit të interesave në ushtrimin e funksioneve publike”, i ndryshuar; VKM-së nr. 673 datë 16.10.2019, “Për organizimin dhe funksionimin e Agjencisë Kombëtare të Arsimit, Formimit Profesional dhe Kualifikimeve”; Udhëzimit nr. 27, datë 30.07.2018, “Për formatet dhe procedurat kurrikulare të arsimit dhe formimit profesional”; Urdhrit nr. 936, datë 31.07.2025, “Për disa shtesa dhe ndryshime në urdhrin nr. 99, datë 25.5.2021, “Për miratimin e Katalogut Kombëtar të Kualifikimeve Profesionale”, i ndryshuar; Urdhrit nr. 69 datë 14.04.2016, “Për rishikimin e planeve mësimore të lëndëve të përgjithshme për arsimin profesional”; Urdhrit të MAS nr. 281, datë 06.06.2024, “Për miratimin e planeve mësimore të kulturës së përgjithshme për arsimin e mesëm profesional”; Urdhrit të Drejtorit të Përgjithshëm të AKAFPK-së, nr. 21, datë 13.04.2023, “Për miratimin e Udhëzuesit “Për procedurat e përzgjedhjes dhe shpërblimit të specialistëve të jashtëm dhe bashkëpunëtorëve në projekte, me kontratë, për realizimin e veprimtarive zhvillimore të AKAFPK-së”, shpall konkurrimin për specialistë të jashtëm lidhur me:   

1. Validimin e 2 (dy) Skeletkurrikulave të Arsimit Profesional:

 

• Validimi i skeletkurrikulit të kualifikimit profesional “Shërbime mjetesh transporti” (2-vjeçar), niveli II në KSHK, referuar nivelit II në KEK.
• Validimi i skeletkurrikulit të kualifikimit profesional “Shërbime mekatronike për mjetet e rënda të transportit” (1-vjeçar), niveli V në KSHK, referuar nivelit V në KEK.

   

2. Kërkesa për validuesit e skeletkurrikulave:

2.1. Kërkesa të përgjithshme:

1. Të kenë aftësi komunikuese me shkrim dhe me gojë;
2. Të kenë aftësi të punës në grup;
3. Të përdorin programet bazë të kompjuterit;
4. Të zotërojnë teknikat e komunikimit elektronik;
5. Të përdorin literaturë në gjuhë të huaj.

  2.2. Kërkesa të veçanta:

1. Të kenë mbaruar arsimin e lartë në fushën përkatëse profesionale;
2. Mësimdhënës: Të kenë përvojë pune në AFP dhe/apo në arsimin e lartë në kualifikimin profesional të kërkuar (të paktën 3 vitet e fundit);
3. Ekspertë të biznesit: Të kenë përvojë pune në fushën profesionale përkatëse (të paktën 3 vitet e fundit);
4. Të mos kenë qenë pjesë e grupeve të punës për rishikimin e skeletkurrikulit të mësipërm.

  2.3. Kandidatët duhet të paraqesin dokumentacionin e mëposhtëm:

1. Kërkesë për aplikim referuar njoftimit përkatës;
2. CV në shqip;
3. Fotokopje e dokumenteve të diplomimit/certifikimit që vërtetojnë kualifikimin përkatës;
4. Dokument zyrtar që vërteton kohëzgjatjen e përvojës në punë (fotokopje të librezës së punës/vërtetim pune/vërtetim për pagesën e kontributeve të sigurimeve shoqërore nga e-albania) në fushën përkatëse;
5. Dokument zyrtar nga institucioni përkatës, ku specifikohen lënda/lëndët ose moduli/modulet e zhvilluara, si dhe kohëzgjatja (të paktën 3 vitet e fundit);
6. Çdo dokumentacion tjetër që vërteton kryerjen e kualifikimeve, trajnimeve dhe specializimeve të ndryshme, referuar njoftimit përkatës (nëse disponohen).

 

3. Kontrata me specialistët e jashtëm që do të shpallen fitues do të ketë kohëzgjatje dy javore, duke filluar nga data e nënshkrimit të saj.

 

4. Çdo grup pune për validimin e skeletkurrikulave do të jetë i përbërë nga 3 ÷ 5 anëtarë të shpallur fitues.

  Kujdes: Mosparaqitja e plotë e dokumenteve sjell s’kualifikim të kandidatit. Kandidatët duhet të paraqesin dokumentet brenda datës 20 shkurt 2026, ora 14.00. Të gjitha njoftimet lidhur me procedurat e aplikimit do të gjenden në adresën e internetit të Agjencisë Kombëtare të Arsimit, Formimit Profesional dhe Kualifikimeve: www.akafp.gov.al Dokumentacioni dërgohet me e-mail në adresën: info.akafp@akafp.gov.al pranë zyrave të AKAFPK-së, në adresën: Rruga: Mustafa Lleshi, Godina e Thesarit, Kati i tretë , Tiranë. Tel. 04 22 37087   Vini re: E-maili i dërguar NUK duhet të përmbajë dokumente të ZIP-uara.