Njoftim i dates 5 Qershor 2023 – kërkohen specialistë të jashtëm për hartimin e standardit të profesionit

Agjencia Kombëtare e Arsimit, Formimit Profesional dhe Kualifikimeve (AKAFPK), në mbështetje të neneve 659, 850-876 të Ligjit nr. 7850, datë 29.07.1994, “Kodi Civil i Republikës së Shqipërisë”, i ndryshuar, të Ligjit nr. 69, datë 21.06.2012, “Për Sistemin Arsimor Parauniversitar në Republikën e Shqipërisë”, i ndryshuar, të Ligjit nr. 15/2017, datë 16.02.2017 “Për Arsimin dhe Formimin Profesional në Republikën e Shqipërisë”, të Ligjit nr. 10247, datë 04.03.2010 “Për Kornizën Shqiptare të Kualifikimeve”, i ndryshuar, të Ligjit nr. 9380, datë 28.04.2005 “Për të drejtën e autorit dhe të drejtat e tjera të lidhura me të”, i ndryshuar, të Ligjit nr. 9367, datë 07.04.2005, “Për parandalimin e konfliktit të interesave në ushtrimin e funksioneve publike”, i ndryshuar, të VKM-së nr. 673 datë 16.10.2019 “Për organizimin dhe funksionimin e AKAFPK-së” dhe të Urdhrit nr. 21, nr. prot 113/1, datë 13.04.2023, “Për miratimin e Udhëzuesit “Për procedurat e përzgjedhjes dhe shpërblimit të specialistëve të jashtëm dhe bashkëpunëtorëve në projekte, me kontratë për realizimin e veprimtarive zhvillimore të AKAFPK””, shpall konkurrimin për specialistë të jashtëm lidhur me:

1. “Riparues të pajisjeve elektro-shtëpiake dhe të tjera”
2. “Përgjegjës prodhimi për përpunimin e drurit”
3. “Teknik silvikulturë (drurët)”

Grupi i punës do të angazhohet për të hartuar standardet e profesionit, duke përcaktuar funksionet, detyrat, njohuritë dhe kriteret e performancës për profesionin në fjalë. Grupi i punës duhet të paraqitet pranë AKAFPK-së për të zhvilluar takimet e përbashkëta dhe të japë kontribut aktiv, në përbërje të grupit të punës, në diskutimin dhe në përgatitjen e dokumentacionit të hartimit të standardit të profesionit. Grupi i punës duhet të përbëhet nga 5-8 anëtarë. Ky angazhim do të realizohet për një periudhë me kohëzgjatje 1 (një) mujore. Kandidatët për hartimin e standardit të profesionit “Riparues të pajisjeve elektro-shtëpiake dhe të tjera”, “Përgjegjës prodhimi për përpunimin e drurit” dhe “Teknik silvikulturë (drurët)” duhet të plotësojnë respektivisht këto kritere:

• Kërkesa të përgjithshme:

1. Të kenë aftësi komunikuese me shkrim dhe me gojë;
2. Të kenë aftësi të punës në grup;
3. Të përdorin programet bazë të kompjuterit;
4. Të zotërojnë teknikat e komunikimit elektronik;
5. Të përdorin literaturë në gjuhë të huaj.

• Kërkesa të veçanta për hartuesit e standardit të profesionit:
  1. Të kenë të paktën arsimin e mesëm dhe një kualifikim në fushën profesionale përkatëse ose arsimin e lartë në fushën profesionale përkatëse;
  2. Të kenë përvojë pune në fushën profesionale përkatëse ose në mësimdhënie në kulturën profesionale të arsimit të mesëm dhe/ose të arsimit të lartë, në fushën profesionale përkatëse (të paktën 3 vitet e fundit);
  3. Të kenë marrë pjesë në veprimtari të ndryshme trajnuese për zhvillimin e tyre profesional.

• Kandidatët duhet të paraqesin dokumentacionin e mëposhtëm:

1. Kërkesë për Aplikim;
2. CV;
3. Fotokopje e Diplomës së arsimit të përfunduar;
4. Dokument që vërteton kohëzgjatjen e përvojës në punë (fotokopje e librezës së punës/vërtetim pune/deklarata e kontributeve nga ealbania) në fushën përkatëse;
5. Për mësimdhënësit duhet një vërtetim nga institucioni për lëndën/ët që jep dhe kohëzgjatjen;
6. Fotokopje të dokumenteve që tregojnë kryerjen e kualifikimeve, trajnimeve dhe specializimeve të ndryshme (nëse disponohen).

Kujdes: Mosparaqitja e plotë e dokumenteve sjell s’kualifikim të kandidatit. Kandidatët duhet të paraqesin dokumentet brenda datës 09.06.2023  Aplikuesit do të vlerësohen në bazë të dokumentacionit të dorëzuar, në përputhje me kërkesat e këtij njoftimi dhe fituesit do të njoftohen brenda 5 ditësh (kalendarike) nëpërmjet email-it. Dokumentacioni dorëzohet: – pranë zyrave të AKAFPK-së, në adresën: rruga “Mustafa Lleshi”, Godina e Thesarit, Kati i tretë, Tiranë; – në formë elektronike në email-in: info.akafp@akafp.gov.al.