Njoftim i dates 12 Maj 2025 – kërkohen specialistë të jashtëm për validimin e standardeve të profesioneve sipas fushave të mëposhtme

Agjencia Kombëtare e Arsimit, Formimit Profesional dhe Kualifikimeve (AKAFPK), në mbështetje të neneve 659, 850 – 876 të Ligjit nr. 7850, datë 29.07.1994, “Kodi Civil i Republikës së Shqipërisë”, i ndryshuar, të Ligjit nr. 69, datë 21.06.2012, “Për Sistemin Arsimor Parauniversitar në Republikën e Shqipërisë”, i ndryshuar, të Ligjit nr. 15/2017, datë 16.02.2017 “Për Arsimin dhe Formimin Profesional në Republikën e Shqipërisë”, i ndryshuar, të Ligjit nr. 10247, datë 04.03.2010 “Për Kornizën Shqiptare të Kualifikimeve”, i ndryshuar, të Ligjit nr. 9380, datë 28.04.2005 “Për të drejtën e autorit dhe të drejtat e tjera të lidhura me të”, i ndryshuar, të Ligjit nr. 9367, datë 07.04.2005, “Për parandalimin e konfliktit të interesave në ushtrimin e funksioneve publike”, i ndryshuar, të VKM-së nr. 673 datë 16.10.2019 “Për organizimin dhe funksionimin e AKAFPK-së”, si dhe të Urdhrit nr. 21, nr. prot 113/1, datë 13.04.2023, “Për miratimin e Udhëzuesit “Për procedurat e përzgjedhjes dhe shpërblimit të specialistëve të jashtëm dhe bashkëpunëtorëve në projekte, me kontratë për realizimin e veprimtarive zhvillimore të AKAFPK””, shpall konkurrimin për specialistë të jashtëm lidhur me:

1. Tekstil – konfeksion: Standarde profesionesh (“Dizenjues të produkteve dhe veshjeve” dhe “Menaxher i mesëm në tekstil – konfeksione”). 

2. Mekanikë: Standard profesioni (“Teknikë të inxhinierisë mekanike”) 

3. Bujqësi: Standard profesioni (“Teknik i mesëm në bujqësi”) 

4. Ndërtim: Standard profesioni (“Ndihmës në ndërtim”)

5. Shërbime Mjetesh Transporti: Standard profesioni (“Ndihmës në autoservis”)

6. Elektroteknikë: Standard profesioni (“Teknik elektrik”)

7. Nxjerrja e naftës, gazit dhe ujit: Standard profesioni (“Teknik të shpim – shfrytëzimit të vendburimeve të naftës, gazit dhe ujit”) 

8. Shërbime Sociale dhe Shëndetësore: Standarde profesionesh (“Kujdestar për të moshuarit” dhe “Asistentë të punës sociale”)

9. Ekonomi – biznes: Standarde profesionesh (“Ndihmës në ekonomi – biznes” dhe “Menaxher i mesëm në biznes”) 

10. Veterinari: Standard profesioni (“Teknik/menaxher i mesëm në veterinari”) 

11. Termohidraulikë: Standard profesioni (“Ndihmës në termohidraulikë”)

Grupet e punës do të angazhohen për të validuar standardet e profesionit, duke u bazuar në kriteret përkatëse. Grupet e punës duhet të paraqitet pranë AKAFPK-së për të zhvilluar takimet e përbashkëta dhe të japin kontribut aktiv. Grupet e punës duhet të përbëhen nga 3-4 anëtarë. Ky angazhim do të realizohet për një periudhë me kohëzgjatje 1 (një) mujore. Kandidatët për validimin e standardit të profesionit të sipër përmendura duhet të plotësojnë respektivisht këto kritere:

• Të mos kenë qenë pjesë e grupeve të punës për hartimin e këtyre dokumentave.

• Kërkesa të përgjithshme:

1. Të kenë minimalisht arsimin e mesëm dhe një kualifikim në fushën përkatëse profesionale;
2. Të kenë aftësi të mira komunikuese dhe të punës në grup;
3. Të kenë aftësi për të përdorur literaturë në gjuhë të huaj;
4. Të përdorin kompjuterin.

• Kërkesa të veçanta për validuesit e standardit të profesionit:

– Ekspertë të biznesit: Të kenë të paktën 3 vite përvojë pune në fushën profesionale përkatëse. – Mësimdhënës: Të kenë të paktën 3 vitet e fundit përvojë pune në mësimdhënie në fushën profesionale të kërkuar.

• Kandidatët duhet të paraqesin dokumentacionin e mëposhtëm:

1. Kërkesë për Aplikim;
2. CV;
3. Fotokopje e Diplomës së arsimit të përfunduar;
4. Dokument që vërteton kohëzgjatjen e përvojës në punë (fotokopje e librezës së punës/vërtetim pune/deklarata e kontributeve nga e-albania) në fushën përkatëse;
5. Për mësimdhënësit duhet një vërtetim nga institucioni për lëndën/ët që jep dhe kohëzgjatjen;
6. Fotokopje të dokumenteve që tregojnë kryerjen e kualifikimeve, trajnimeve dhe specializimeve të ndryshme (nëse disponohen).

Kujdes: Dokumentacioni duhet të jetë në gjuhën shqipe, i qartë dhe lehtësisht i lexueshëm. Mosparaqitja e plotë e dokumenteve sjell s’kualifikim të kandidatit. Kandidatët duhet të paraqesin dokumentet brenda datës 16.05.2025.  Aplikuesit do të vlerësohen në bazë të dokumentacionit të dorëzuar, në përputhje me kërkesat e këtij njoftimi dhe fituesit do të njoftohen brenda 5 ditësh (kalendarike) nëpërmjet email-it. Të gjitha njoftimet lidhur me procedurat e aplikimit do të gjenden në adresën e internetit të Agjencisë Kombëtare të Arsimit, Formimit Profesional dhe Kualifikimeve www.akafp.gov.al. Dokumentacioni dorëzohet: – pranë zyrave të AKAFPK-së, në adresën: rruga “Mustafa Lleshi”, Godina e Thesarit, Kati i tretë, Tiranë; – në formë elektronike në email-in: info.akafp@akafp.gov.al.