Njoftim i dates 5 dhjetor 2025-për përzgjedhjen e anëtarëve zëvendësues të komitetit sektorial të teknologjisë së informacionit dhe komunikimit (tik)

Në mbështetje të nenit 100 të Kushtetutës, të pikës 5, të nenit 11, të ligjit nr. 10247, datë 04.03.2010, “Për Kornizën Shqiptare të Kualifikimeve”, i ndryshuar, të Vendimit nr. 426, datë 26.06.2019 të Këshillit të Ministrave “Për mënyrën e organizimit, të funksionimit, si dhe kriteret e përzgjedhjes së anëtarëve të Komiteteve Sektoriale dhe mënyrën e shpërblimit të tyre”, të Urdhrit të përbashkët të ministrit të Arsimit, Sportit dhe Rinisë dhe të ministrit të Financave dhe Ekonomisë nr. 64, datë 30.03.2021 “Për ngritjen dhe përbërjen e Komitetit Sektorial të Teknologjisë së Informacionit dhe Komunikimit”, procesverbalit nr. 501/9 prot., datë 28.12.2021 të AKAFPK-së “Për pjesëmarrjen në përbërje të Komitetit Sektorial TIK, email-it të përfaqësuesit të Konfederatës së Sindikatave të Shqipërisë, znj. Engjëllushe Ibrahimi për dorëheqje nga pozicioni i anëtares së Komitetit Sektorial TIK, për shkak të largimit nga pozicioni që mbante pranë kësaj Konfederate, email-it të përfaqësuesit të biznesit z. Gentian Likaj për dorëheqje nga pozicioni i anëtarit të Komitetit Sektorial për asye personale, si dhe Urdhrit nr. 21, nr. 113/1 prot., datë 13.04.2023, të  Drejtorit të Përgjithshëm të Agjencisë Kombëtare të Arsimit, Formimit Profesional dhe Kualifikimeve (AKAFPK) “Për miratimin e udhëzuesit për procedurat e përzgjedhjes dhe shpërblimit të specialistëve të jashtëm me kontratë për realizimin e veprimtarive zhvillimore në fushën e Arsimit dhe Formimit Profesional”, AKAFPK shpall konkursin për zëvendësimin e dy anëtarëve ekzistues në përbërjen e Komitetit Sektorial të TIK, si përfaqësues të:  

1. shoqatës së punëmarrësve të sektorit të TIK, (1 anëtar);
2. biznesit; (1 anëtar);

  Kandidatët duhet të plotësojnë kriteret specifike të mëposhtme:  

• Të jenë përfaqësues të shoqatës së punëmarrësve të sektorit të TIK, me numrin më të madh të anëtarëve në sektorin përkatës, me përvojë jo më pak se 3 (tre) vjet në sektorin përkatës të shoqatës (për përfaqësuesin 1);
• Të jenë përfaqësues të biznesit me praktika të pasura në zhvillimin e burimeve njerëzore në sektorin përkatës (për përfaqësuesin 2);

  Kandidatët duhet të plotësojnë kriteret e përgjithshme të mëposhtme:  

• Të jenë njohës të mirë të sektorit përkatës;
• Të kenë aftësi të mira komunikuese dhe të punës në grup;
• Të kenë aftësi për të përdorur literaturë në gjuhë të huaj;
• Të kenë mbaruar arsimin e lartë në fushën/drejtimin përkatës ose arsimin e mesëm profesional në fushën/drejtimin përkatës.

Kandidatët duhet të paraqesin dokumentacionin e mëposhtëm:

1. Kërkesë për Aplikim (e firmosur nga kandidati, nëse e sjell dorazi);
2. Jetëshkrim (CV);
3. Fotokopje e diplomës së shkollës së lartë ose të mesme;
4. Kopje të dokumentacionit që vërteton përvojën në punë, në fushën përkatëse. 

Kandidati që do të shpallet fitues do të jetë anëtar i Komitetit Sektorial të TIK me një kohëzgjatje deri në mbarimin e afatit të anëtarit që ka zëvendësuar. Kandidatët duhet të dorëzojnë dosjen me këto dokumente pranë AKAFPK-së, me adresë: Rr. “Mustafa Lleshi”, Godina e Thesarit, Kati i tretë, Tiranë, ose ti nisin në mënyrë elektronike në adresën info.akafp@akafp.gov.al. Mosparaqitja  e dokumenteve të mësipërme, sjell s’kualifikim të kandidatit.   Afati i dorëzimit të dokumentacionit: 10.12.2025.