Njoftim i datës 8 Shtator 2026 – PËR VLERËSUES TË JASHTËM TË PROCESIT TË AKREDITIMIT

NJOFTIM PËR BASHKËPUNËTORË

PËR VLERËSUES TË JASHTËM TË PROCESIT TË AKREDITIMIT

Agjencia Kombëtare e Arsimit, Formimit Profesional dhe Kualifikimeve (AKAFPK), në mbështetje të Kushtetutës së Republikës së Shqipërisë, të ndryshuar; Ligjit nr. 7961, datë 12.7.1995, “Kodi i Punës i Republikës së Shqipërisë”, të ndryshuar; Ligjit nr. 44/2015, “Kodi i Procedurave Administrative i Republikës së Shqipërisë”; Ligjit nr. 15/2017, “Për Arsimin dhe Formimin Profesional në Republikën e Shqipërisë”, të ndryshuar; Ligjit nr. 10247, datë 04.03.2010, “Për Kornizën Shqiptare të Kualifikimeve”, të ndryshuar; Ligjit nr. 69/2012, “Për Sistemin Arsimor Parauniversitar në Republikën e Shqipërisë”, të ndryshuar; VKM-së nr. 673, datë 16.10.2019, “Për Organizimin dhe Funksionimin e Agjencisë Kombëtare të Arsimit, Formimit Profesional dhe Kualifikimeve”; Urdhrit nr. 845, datë 03.07.2025, “Për Miratimin e Rregullores për Standardet, Kriteret dhe Procedurat e Akreditimit të Ofruesve të Arsimit dhe Formimit Profesional”; Urdhrit nr. 21, datë 13.4.2023, “Për miratimin e Udhëzuesit për procedurat e përzgjedhjes dhe shpërblimit të specialistëve të jashtëm me kontratë dhe bashkëpunëtorëve në projekte me kontratë për realizimin e veprimtarive zhvillimore të AKAFPK-së”, si dhe akteve të tjera ligjore dhe nënligjore në fuqi që lidhen me veprimtarinë e këtij institucioni, shpall konkurrimin për bashkëpunëtorë për:

VLERËSIMIN E JASHTËM PËR AKREDITIMIN INSTITUCIONAL

Të ofruesit publik të AFP-së, Shkollës së Mesme Teknike Ekonomike dhe Hoteleri-Turizëm “Antoni Athanas”, Sarandë, e cila ofron kualifikimet profesionale të mëposhtme:

1. Hoteleri-Turizëm, Niveli II i KSHK-së;
2. Shërbime në hotel dhe restorant, Niveli III i KSHK-së;
3. Kuzhinë-Pastiçeri, Niveli III i KSHK-së;
4. Kuzhinë (Arsim i dyfishtë), Niveli III i KSHK-së;
5. Hoteleri-Turizëm, Niveli IV i KSHK-së;
6. Ekonomi-Biznes, Niveli II i KSHK-së;
7. Llogari, Niveli IV i KSHK-së;
8. Menaxhim i strukturave akomoduese (Arsim i dyfishtë), Niveli V i KSHK-së;
9. Ndërmjetësimi i pasurive të paluajtshme, Niveli V i KSHK-së;
10. Menaxhim i furnizimit dhe logjistikës (Arsim i dyfishtë), Niveli IV i KSHK-së.

SPECIFIKIMET E DETYRËS

Specialistët e jashtëm do të angazhohen në procesin e vlerësimit të jashtëm për akreditim. Grupi i Vlerësimit të Jashtëm (GVJ) analizon dokumentet dhe të dhënat e ofruesit të AFP-së dhe harton planin paraprak të vizitës në terren.

Vizita në terren zgjat nga 1 deri në 3 ditë, sipas planit të dakordësuar. Anëtarët e GVJ-së mbledhin evidencat e nevojshme sipas standardeve dhe kritereve të akreditimit, nëpërmjet metodave të ndryshme të mbledhjes së informacionit, dhe hartojnë raportin përfundimtar të akreditimit.

KËRKESAT PËR KANDIDATËT

Kërkesa të përgjithshme

• Të kenë aftësi komunikuese me shkrim dhe me gojë;
• Të kenë aftësi për punë në grup;
• Të përdorin programet bazë kompjuterike;
• Të zotërojnë teknikat e komunikimit elektronik;
• Të jenë në gjendje të përdorin literaturë në gjuhë të huaj.

Kërkesa të veçanta

• Të kenë përfunduar arsimin e lartë, të paktën në nivelin 7 të KSHK-së;
• Të kenë jo më pak se 5 vite përvojë pune në AFP dhe/ose në fushat profesionale përkatëse;
• Të jenë të certifikuar si vlerësues të jashtëm të procesit të akreditimit;
• Të kenë ndjekur trajnimin e vazhduar për procesin e akreditimit;
• Të mos jenë të përjashtuar nga e drejta për të vepruar si vlerësues të jashtëm të procesit të akreditimit;
• Të kenë nënshkruar formularin e deklarimit se nuk kanë konflikt interesi me AKAFPK-në dhe ofruesin e AFP-së, sipas formatit bashkëlidhur (Shtojca 1);
• Të mos jenë dënuar me vendim të formës së prerë nga gjykata për kryerjen e një vepre penale.

DOKUMENTACIONI PËR APLIKIM

Kandidatët duhet të paraqesin dokumentacionin e mëposhtëm:

• Kërkesë për aplikim, referuar njoftimit përkatës, e firmosur nga kandidati;
• Fotokopje të dokumentit të identifikimit;
• Jetëshkrim (CV);
• Fotokopje të dokumenteve të diplomimit dhe/ose certifikimit që vërtetojnë kualifikimin përkatës;
• Dokument zyrtar që vërteton kohëzgjatjen e përvojës në punë në fushën përkatëse, si fotokopje e librezës së punës, vërtetim nga e-Albania dhe/ose çdo dokument tjetër zyrtar që plotëson këtë kërkesë;
• Kopje të certifikatës së lëshuar nga AKAFPK-ja si vlerësues i jashtëm në procesin e akreditimit të IoAFP-ve;
• Deklaratë të nënshkruar se nuk ka konflikt interesi me stafin e AKAFPK-së dhe ofruesin publik të AFP-së, sipas formatit bashkëlidhur (Shtojca 1);
• Dëshmi penaliteti;
• Çdo dokumentacion tjetër që vërteton kryerjen e kualifikimeve, trajnimeve apo specializimeve të ndryshme, nëse kandidati e disponon.

NUMRI I ANËTARËVE TË GRUPIT

Numri i anëtarëve të Grupit të Vlerësimit të Jashtëm për këtë proces akreditimi është 3 (tre) anëtarë.

KOHËZGJATJA E KONTRATËS

Kontrata lidhet për një periudhë prej 6 (gjashtë) muajsh ose konsiderohet e përmbushur kur janë plotësuar kërkesat e përcaktuara në pikën “b” të fazës III të nenit 12, si dhe në pikën 5 të nenit 20 të Urdhrit nr. 845, datë 03.07.2025, të Ministrit të Ekonomisë, Kulturës dhe Inovacionit.

Kontrata hyn në fuqi nga data e nënshkrimit të saj.

MËNYRA E APLIKIMIT DHE AFATI

Kandidatët duhet të dorëzojnë dosjen me dokumentacionin e kërkuar në Zyrën e Administratës së AKAFPK-së, në adresën:

Rruga Mustafa Lleshi, Kati III, Godina e Thesarit, Tiranë

Dokumentacioni mund të dorëzohet edhe në mënyrë elektronike, i skanuar, në adresën: info.akafp@akafp.gov.al.

Mosparaqitja e plotë e dokumentacionit brenda afatit të përcaktuar sjell skualifikimin e kandidatit.

Afati për dorëzimin e dokumentacionit është deri më datë 14 shtator 2026, ora 16:30.